Við náðum ekki að panta jólakveðju á rás 1, rétt of seinar. Í staðinn á Þórhildur að fá að senda jólakveðju í beinni á létt 96,7 um þrjúleytið á morgun, Þorláksmessu.
Áðan, á meðan ég flatti laufabrauð af miklum móð, sömdu þær stöllur útvarpsvænt bréf til að biðja um óskalög við jólabaksturinn. Skemmst frá því að segja að hún Sigga Lund sendi bréf um hæl og bað um að fá að hringja í okkur og taka viðtal, íslensk jól í útlöndum - fátt merkilegra. Hlustið öll.

Ágústa hefur ekki enn fengið að sjá mikið af Finnlandi. Myrkrið var löngu skollið á þegar hún lenti og ofan á það bættist bylurinn í gær. Í dag fórum við út í Spar og keyptum í jólamatinn og í smákökurnar. Svo fórum við beint heim að myndast.
Og við erum búnar að standa okkur svo vel: kókostoppar (soldið flatir reyndar), piparkökur og síðast en ekki síst: laufabrauð. Ég hafði aldrei steikt laufabrauð áður en séð það gert fyrir hver jól frá ómunatíð. Og það gekk svona ljómandi vel.
Nú ætti mamma sko að vera ánægð með mig; tvo þriðju af bakstursuppskriftum sem hún sendi mér hef ég notað, þar af piparkökur tvisvar.

Í jólamatinn keyptum við kinkkurulla, skinkurúllu. Það er víst algengasti jólamaturinn hér í Finnlandi. Hérna fæst varla lambakjöt og rjúpur... ég spurði ekki einu sinni. Þó hefði Ágústa nú kannski getað komið með soleiðis frá Skotlandi. En heima hjá mér er ekki svo mikil rjúpuhefð svo að ég sakna þeirra ekki.
Svo ætlum við að hafa möndlugraut og Þórhildur ætlar að gera rauðkál að hætti Hagalín. Brúnaðar kartöflur og eplasalat og ávaxtasalat með Siggusósu í eftirrétt.

Ég reyndi að útskýra fyrir Frökkum að íslensk jól væru Fjölskylduhátíð með stóru effi. Ef ég væri á Íslandi myndi ég aldrei halda jólin hátíðleg með öðrum en fjölskyldunni.
Þetta er líka krísa í flestum samböndum. Hvenær er sambandið komið á það stig að annað hvort fórni jólunum með fjölskyldunni til að eiga jól með kærasta/-u?

Hvergi hef ég vitað óhátíðlegri jól en í Bretlandi. Þar eru jólin nokkrir frídagar, tilvalið tilefni til að fara á fyllirí. Fyrir nánari lýsingu, sjá vísindavefinn um jól í Bretlandi. Frakkar taka jólin þó hátíðlega þó það sé ekki endilega með fjölskyldunni.

Adel sagði mér að hann væri að hugsa um að fá sér jólatré.
- Af hverju? spurði ég hann. Þú heldur ekki upp á jólin.
- Af hverju ekki? Bara að vera með. Þú fastaðir nú á Ramadan, minnti hann mig brosandi á.
- Jú, vissulega gerði ég það... Veistu af hverju við höldum upp á jólin?
- Eeee... af því Jesú fæddist og eee...
Svo ég tók hann í smá kristinfræðitíma og útskýrði eftir megni merkingu jólanna, svona til að endurgjalda trúarbragðafræðsluna sem ég fékk í nóvember.

Allavega... við erum búnar að skreyta piparkökurnar og tilbúnar undir gleðileg jól - hyvää joulua.