Sjaldan hefur mér fundist jafngaman, í seinni tíð, að hjóla heim af bókasafninu drekkhlaðin bókum. Í vetur var ég umkringd bókum sem báru titla eins og Comparative public administration, Stjórnmálaheimspeki, L'histoire de la France svo nokkrar séu nefndar. Þær safna ryki þessa dagana eða liggja á kafi undir öðrum bókum.

"En iii, hver fer á bókasafnið í fríinu sínu?"

Vits er þörf þeim sem víða ratar og þess vegna eru núna mannhæðarháir bókastaflar allt í kringum rúmið mitt. Ólíkt bókunum sem ég las í vetur tengjast þessar ferðalögum og ferðasögum hér á landi og víðar. Milli þess sem ég glöggva mig á jarðfræði og náttúrufari læt ég mig dreyma um ferðalög í Suðaustur-Asíu eða skútusiglingar milli Kyrrahafseyja. Næst á listanum er Suður-Ameríka; Chile og Argentína.

Missti af fyrstu atrennu útileguþrennu sumarsins í Skaftafelli. Þrátt fyrir að færri hafi sóst eftir blíðunni í Skaftó en rokinu á Varmalandi í fyrra var þar svo sannarlega góðmennt. Sannarlega slæmt að komast ekki með, ég hefði þá kannski getað hindrað einn eða tvo sólbruna enda fer ég sjaldnast úr húsi án sólarvarnar. - Do make a note to self on that one, þið maurar!

Það fór ekki fram hjá mér að áætlunarflugið til Grænlands er byrjað. Hýsti einn Frakka í millilendingu til Grænlands. Á sunnudeginum fór ég svo í fermingarveislu hjá frænda mínum. Fermingunni hafði verið frestað langt fram eftir sumri vegna þess að hann á frændfólk á Grænlandi. Það var ekki fyrr en núna sem þau gátu mætt í perlusaumuðu sparipelsunum sínum, voða fín öll sömul.

Eftir vinnu í gær trítluðum við Halla upp á Esjuna. Við ætluðum að finna hæsta toppinn en töpuðum áttunum í skýjunum. Ég er samt viss um að við löbbuðum yfir hann amk þrisvar. Getur annars einhver kunnugur sagt mér: er Hábungan e-ð merkt? Er skilti sem segir : Velkomin á Hábungu, hæsta punkt Esjunnar?