Kosningar, jöklabjarganir og hvalsprengjur

Auðvitað gat ég ekki haldið mig frá kosningasjónvarpinu. Var mætt klukkan sex á sunnudagsmorgninum, eftir tveggja tíma svefn kom fjórtán tíma vakt. En ég fékk samt skemmtilegustu verkefnin. Átti þrjár skottfréttir í kvöldfréttatímanum... Íkonar í Hallgrímskirkju (mjög montin af myndatökunni...), tónleikar í óperunni og svo skemmtilegustu móment kosningavökunnar (mjög montin af klippivinnunni, á hana alveg sjálf).

Svo eftir fjórtán tíma vaktina var borinn bjór í fólkið... Þarf ekki að tvíyrða um það að það þurfti ekki marga á mann þegar flestir voru vansvefta og að niðurlotum komnir. Enda voru flestir komnir heim áður en langt um leið.

Svo er búið að ganga á með meirihlutamyndanafréttum, yfirstrikunum og svo framvegis. Og svo hvalhræi á reki sem var sprengt í loft upp til að sökkva því rétt utan við Gróttu með 20 kílóum af sprengiefni (skoðiði hádegisfréttir þriðjudags 30.maí.) Og svo snjóflóð á Hvannadalshnjúki og umfangsmiklum björgunaraðgerðum þeim fylgjandi. Að sjálfsögðu fór ég beint í fréttaflutning af því þegar ég mætti á vakt kl tvö og það tók allan daginn.
Svo var hringt í mig tíu mínútum fyrir síðasta fréttatíma kvöldsins og þá fékk ég að heyra af því að fallhlífastökkvararnir sem öll þjóðin hampar nú sem hetjum, þeir lentu langt frá slysstað og komu aldrei nálægt björguninni sjálfri. Það var eiginlega bara þyrluáhöfnin sem reddaði þessu upp á eigin spýtur... Nú er spurningin: á maður að skemma hetjuímynd fallhlífasveitar Flugbjörgunarsveitarinnar sem loksins fengu uppreisn æru, eftir að hafa æft sig í þrjá áratugi en aldrei fengið að stökkva á slysstað? Er sagan ekki bara ágæt svona? :)

Og já, svo eru víst einhverjar fréttir af mér... Ég er búin að kaupa mér bíl! Fyrsta skipti á minni lífsfæddri ævi sem ég eignast farartæki sem ekki er fótstigið. Hann fær nú samt að standa á Njálsgötunni eða Bergþórugötunni meðan ég er í bænum, hann er bara til landsbyggðarflakks. Samt tímamót. Ekki var hún nú dýr, drossían. Ég hefði ekki getað keypt mikið í nýja Rollsinum sem var verið að sýna í Ásmundarsafni fyrir 85 þúsundkallinn, hann átti víst að kosta eitthvað um 70 milljónir.

Er að reyna að fá frí frá fréttunum til að komast í eina tíu daga Grænlandsferð í byrjun júlí. Ef ég næ einni Grænlandsferð og einni klassískri yfirferð um Ísland, þá er ég sátt. Þá get ég þraukað sumarið á illa loftræstri fréttastofu.

Svo er ég komin með blaðamannapassa á Hróarskeldu og á Reykjavík Tropic tónlistarhátíðina sem er um helgina og líklega á Belle and Sebastian tónleika sem verða í lok júlí. Þannig að það stefnir allt í að sumarið geti bara orðið mjög skemmtilegt. Það á bara eftir að ganga frá strandpartíinu!

Jöklaferðir og túristaleikur

Alf félagi minn frá Bandaríkjunum er í heimsókn.
Ég keyrði frá Skaftafelli á aðfaranótt sunnudags og svo aftur þangað á mánudagsmorgni til að sýna útlendingnum landið. Og akkúrat þá er kaldasta vor í manna minnum og sandrok á leiðinni heim í gær.

Svona getur þetta verið, - óútreiknanlegt.
Greyið fuglarnir! Og litlu lömbin...

Svo mætti ég í vinnuna klukkan fimm í morgun. Og ekki dugði minna til en þrettán tíma vinnudagur.

Var m.a. að klippa innslag í Ísland í dag, úr efni sem ég tók uppi á jökli á öryggisnámskeiði hjá ÍFLM. Stökk niður í jökulsprungur undir Rótarfellsnjúki og reyndi að hlífa myndavélinni við mesta hnjaskinu... Var allavega mjög fegin að sjá að hún virkaði enn þegar hún kom aftur í bæinn. Kemur líklega í sjónvarpinu í næstu viku, þegar fólk er aðeins búið að jafna sig á kosningaæðinu.

Mér var boðið að manna kosningavaktina á Akranesi á laugardag og fram á morgun. Langaði rosa mikið til þess, hefði verið mjög skemmtilegt, en... ekki gaman fyrir Bandaríkjamann sem ekkert skilur í íslensku eða íslenskri hreppapólitík að hanga yfir kosningaúrslitum. Þannig að við förum líklega frekar á Snæfellsjökul að renna okkur í staðinn.

Boltabullur takið eftir!

Eins og fram kom í tíufréttum NFS í kvöld eru skráningar hafnar á stórmót í mýrabolta sem haldið verður á Ísafirði aðra helgina í ágúst. Hlýtur bara að vera stórskemmtilegt áhorfs, hvað þá að leika: fótboltaleikur í drullusvaði þar sem gamanið skiptir meira máli en úrslitin. Mæli með að áhugasamir fari í hópferð á Ísafjörð, er að hugsa um að fá að gera frétt um þetta, eða vera kamerukona fyrir Brynju Dögg, hún er víst á leiðinni til Norður-Finnlands til að gera heimildarmynd um íþróttina og hlýtur að vilja fara vestur líka...
Allar nánari upplýsingar á www.myrabolti.com

Önnur tilkynning: ég keypti fótbolta um daginn! Ætlaði að finna blakbolta fyrir strandblak, en þá er víst ekki hægt að kaupa nema á afviknum stað í Hafnarfirði einhvers staðar... Þannig að ég keypti fótbolta, - og þá kólnaði í veðri eftir margra daga úrvalsveður!

En ég heimta bolta á Miklatúni um leið og veðrið kemur til þess. Ólöf, heyrirðu það, þýðir ekki að beila og skríða inn á sirkus...

Grill og sörf

Nú er ég glöð í hjarta mér.

Beið alla síðustu helgi við símann eftir að einhver byði mér í grillpartí. Svona alvöru grillpartí með bjór og mússík úti í garði og sól sem sest án þess að nóttin komi nokkurn tíma. Bjöggi hefur lesið hugsanir mínar (eða kannski hef ég minnst á þetta við strákana í Valshamri á sunnudaginn) því nú er boðað til grillveislu í bakgarðinum hjá honum. Takk fyrir það.

Þá er aðeins eitt sem ég þarf til að fullkomna sumarið sem er að byrja. Það er fjörupartí með bálkesti, havaískyrtum, sörfi á fullu blasti og fáránlegum nýsjálenskum drykkjuleikjum. Hver tekur að sér að skipuleggja soleiðis?
Grunar reyndar að ég verði að láta það gerast ef á að verða af því. Svo látum við boð út ganga og þetta verður eins og í Varmalandi forðum daga...

Það sést hverjir drekka Egils Kristal

Guði sé lof að áhorf á níu-fréttir NFS er ekki mikið. Og Guði sé lof að það er ekki hægt að sjá þær á netinu þannig að þið getið ekki farið og kíkt á níufréttir kvöldsins eftir að hafa lesið þetta.

Ég var nefnilega soldið sein inn í myndver í kvöld...
Svo var eyrað mitt ekki að virka (þ.e. talstöðin í eyranu á mér þar sem myndstjórn segir mér hvað er að gerast) þannig að ég heyrði ekki niðurtalningu og vissi ekki að ég væri komin í mynd fyrr en þau börðu í rúðuna og öskruðu á mig "ÞÚ ERT Í MYND!!" Á því augnabliki var ég hálf undir borði að leita að prompter-fótstiginu (prompterinn er textavélin sem gerir mér kleift að horfa í myndavélina og lesa á sama tíma) og ekkert í mynd nema vatnsflaskan mín, prýðis auglýsing fyrir Egils Kristal og slagorðið þeirra öðlast alveg nýja merkingu...

Í stuttu máli fann ég ekki prompterfótinn og las því fyrsta innganginn upp af blaði, móð og másandi af stressi og af því að hlaupa á síðustu stundu inn í myndver. Þá kom í ljós að sú frétt var ekki komin - sem ég hefði vitað hefði verið kveikt á eyranu mínu, og þurfti að lesa næsta inngang, líka upp af blaði, ekki mjög fallegt. Sú frétt var allt of stutt til standa upp frá borðinu þannig að ég gat ekki reddað prompternum fyrr en eftir þriðju fréttina.
Kannist þið við martraðardrauma þar sem þið eruð í vinnunni og ALLT fer úrskeiðis? Þetta var einn slíkur, sem óvart rættist.

En horfið endilega á tíu-fréttirnar, þar gekk allt vel, og svo skulum við láta eins og þetta hafi aldrei gerst!